Mikakati Ya Upole Na Uana: Tathmini Ya Natala.

Abstract

Katika utafiti huu tumeshughulikia upole kama unavyobainika katika mawasiliano baina ya wahusika katika tamthilia ya Natala. Tumetumia mtazamo wa nadharia ya Upole ya Brown na Levinson (1987) na kuzamia katika kipengele cha mikakati ya upole. Data ya uchunguzi huu ilitokana na matamko ya wahusika katika tamthilia ya Natala. Kauli na matamshi ya wahusika ziliainishwa kiuana na kubainisha zile zilizotumia mikakati ya upole. Lengo la kwanza lilikuwa kubainisha ikiwa wahusika wa kiume wanatumia mikakati ya uople katika Natala. Matokeo yamedhihirisha kuwa wanaume wanatumia mikakati ya upole katika tamthilia ya Natala kuokoa nyuso za wahusika wanaotagusana nao. Hata hivyo imebainika kuwa matumizi ya mkakati hasi wa upole ndio mkakati maarufu miongoni mwa wahusika wa kiume katika Natala. Lengo la pili lilikuwa kuchunguza ikiwa wahusika wa kike wanatumia mikakati ya upole kuwasiliana. Uchunguzi huu unaonyesha kuwa wanawake hutumia mikakati yote minne ya upole. Hata hivyo imebainika kuwa wanawake hutumia mkakati chanya wa upole zaidi. Mkakati ndani ya rekodi kwa upande mwingine unatumiwa kwa njia finyu na wanawake. Aidha tulidhamiria kuonyesha kuwa mikakati ya upole hufanikisha uwasilishaji wa ujumbe kupitia maudhui. Matokeo yanaonyesha kuwa maudhui katika tamthilia ya Natala kama ufisadi, taasubi ya kiume, mila na desturi, umaskini miongoni mwa mengine, yanaibuliwa kupitia matumizi ya mikakati ya upole. Kijumla ni kuwa, kazi hii imeonyesha kuwa pragmatiki mitindo ni kitengo muhimu katika uchunguzi wa fasihi. Hii ni kwa sababu msikilizaji lazima awe na umilisi wa kipragmatiki ili kuelewa maana kamili ya msemaji kwa kuzingatia muktadha wa mazungumzo